Khawthlir – Chanchinthar lawr

Thisen pe

Inrinni khan Bilkhawthlir Kualmawi branch YMA chuan Kolasib District Hospital tan thisen unit 45 an pe a, a petute mipa 33 leh hmeichhia 12 an ni. Zonuam Bial KṬP chuan Aizawl Civil Hospital tan pein, mipa 29 leh hmeichhia pathumin unit 32 an pe a; Dinthar Vengthlang Branch KṬP pawhin Synod Hospital tan unit 26 an pe a, a petute mipa 24 leh hmeichhia pahnih an ni.

Hall hawng

West Phailenga community hall leh YMA Rûn sak thar chu November 28 khan bialtu MLA Lalrobiaka’n a hawng. Hall hi Border Area Development Programme aṭanga sum hmuh cheng nuai 30 sênga sak a ni a, YMA Rûn chu Rs. 6,00,000 sênga sak a ni.

Aizawl zawk

November 28, 2015-a chhuak Vanglainia Poetry Writing Festival-a pakhatna Vanlalruatfela sikul luhna St. Joseph HSS chu  Kolasib ni loin, Aizawl tih zawk tur a ni.

MLA pali zin

Assembly hnuaia Estimate Committee member-te chu Thailand leh Myanmar tlawh turin nimin khan Aizawl an chhuahsan. Estimate Committee member-te hi an chairman Lalrinliana Sailo hoin an kal a, member kal dangte chu Vanlalzawma, R Vanlalvena leh Vanlalawmpuii Chawngthu te an ni. Myanmar khawpui leh Kaladan Multi Modal Transit Transport Project-in a pawh tur Sittwe an tlawh dawn a, December 11-ah Aizawl rawn thleng leh tura beisei an ni.

Truck-in chíl hlum

Ringmuana (55), Lawngtlai College Veng chu Inrinni tlai dar 5 vel khan Lawngtlai Bazar Vengah 407 truck-a a láwn tur chesualin a tla a, truck-in chílin, damdawi-in panpui a nih hnuah a thi.

Ruang chhar

Chhimtuipui lui kam, Tuipui-Ferry-a RDS company balu dahkhawmnaah Inrinni tlai khan ruang chhar a ni. Ruang hi Lawngtlai Police Station-a lak a nih hnuah Vanlalpianga, Tuipui-Ferry a ni tih hriat chhuah a ni.

Rualbanlote Ní

Baptist kohhrante chuan nimin khan Rualbanlote Ní an hmang. He ni pual hian Mizorama Baptist kohhran hrang hrangte chuan chawhma inkhawmah hun an hmang a, thupui chu ‘Ka khawngaihna i tan a tawk e’ tih a ni.

Facebook Comments

Add a Comment