Posted on

Marova Memorial BCA leh Zarkawt mipui an champion: Zarkawt mipui ṭhahnem takin an veng MSL club Zarkawt BCA an ṭawiawm a, Zirtawpni zan Marova Memorial Baksetball Tournament final-ah Khatla TBL 101-87 a hnehin an champion.

Marova Memorial BCA leh Zarkawt mipui an champion

Zarkawt mipui ṭhahnem takin an veng MSL club Zarkawt BCA an ṭawiawm a, Zirtawpni zan Marova Memorial Baksetball Tournament final-ah Khatla TBL 101-87 a hnehin an champion.

Finals game hmasa pahnihah BCA leh TBL te vawi khat ve ve an chak a, Game 3 a hmuhnawm dawn tih chu beisei lawk dan a ni a, a hmuhnawm dan chiah erawh beisei phak bak a la ni cheu.

Hawla Indoor Stadium khat vekin mipui an pungkhawm a, TBL leh BCA ten inkhel hmuhnawm tak lantirin overtime vawi hnih an khel a, inkhel a tawp meuh chuan player panga an foul out. TBL aṭangin an thiampuipa H. Laldinsanga leh R. Lalmalsawma, BCA aṭangin captain David Lalruatfela, Jackson Lalrintluanga leh Henry Lalramngaihawma te an foul out – hei hian inkhel boruak san zia a pho lang.

BCA manager Malsawmtluanga’n Game 2 zawhah TBL shooting guard Vanlalmuana ven dan tur an zir thu a sawi a, Game 3 ṭantirh lamah Dawrpui Vengthar tlangval Muana dah ṭhatin a awm. TBL harsatna belhchhah turin captain Vanlalnunsanga (Lana) chu inhliam vangin quarter khatna bak a inlan thei lo a, inelna ṭan hmain Darliansanga leh Nelson Lalrohlua te an chan tawh bawk avangin Khatla squad a chhah ṭha tawk lo hle.

BCA guard Michael F. Lalawmpuia leh Dede-a te an hmuhnawm a, third quarter a zawh chuan 62-47 in hma an hruai a, awlsam takin an chak dawn niin a lang. Amaherawhchu TBL-in champion zia an chhuah a, Muana leh Gospel Lalthawmmawia te hmangin comeback ropui an lantir a, fourth quarter zawhah 73-73 in an inhnehtawk.

Overtime khelh a ṭul a, TBL che ṭha zuiin second tlemte chauh a awm tawh tihin 79-76 in hma an hruai a, Armed Veng tlangval David-a’n 3 points a score avangin overtime vawi hnih khelh a ngai – MBBA hnuai inelna final-a overtime vawi hnih khelh a ngaih vawi khatna a ni.

TBL-in court chhung leh pawna an hotu Mapuia an chan zui avangin overtime vawi hnihnaah BCA an chungnung a, 101-87 in hnehna an chang.

Mizoram Super League awm hnua tualchhung basketball-a roreltu Khatla TBL hawi sang thei an ni tawh lo a, BCA chu Marova Memorial Tournament-ah a zawnin an champion. 2016 kum tira ṭan tur MSL Season 2 a hmuhnawm ang.

BCA coach Liansangpuia chuan, “Kan trophy hi club hming put chhan Biakchunga tan kan hlan a, ani bakah hian a nu damlohna avanga Kolkata-a awm mek kan head coach Sir Afela tan kan hlan,” tiin a sawi.

The Finals – Thlirna Tawi
Game 1 : BCA   72 – 71   TBL
Game 2 : BCA   58 – 71   TBL
Game 3 : BCA   101 – 87   TBL
BCA-in series 2-1 in an la

– See more at: http://www.vanglaini.org/infiamna/46403#sthash.xVLM9YDc.dpuf

Facebook Comments
Leave a Reply