Posted on

Thubuai chhui nan CCTV hmang ṭangkai

Thubuai chhui nan CCTV hmang ṭangkai

Aizawl khawpuia hmun ṭhenkhata closed circuit television (CCTV) dahte chu thubuai chhuina kawngah an ṭangkapui hle tih police-te chuan an sawi.

Vanglaini palai zawhna chhangin police hotute chuan, “Zana police patrolling kalte leh CCTV control room-a awmte an inbe pawp reng a. Control room-a duty-te’n eng emaw chhui zui ngai deuh an hriat chuan patrolling-te an bia a, patrolling-te’n enzui ngai nia an hriat chu control room-a duty-te an hriattir ṭhin bawk,” an ti.

Police hotute sawi danin, Aizawla police station pali aṭangin zanah patrolling an chhuak ṭhin a, an duty chhung erawh chu boruak awm dan azir a ni.

CCTV hmangin thubuai eng emaw zat chinfel a nih tawh tih sawiin, police hotute chuan, “Thubuai chinfelna atan chauh ni lo, thubuai chhui chhuahna atan pawh CCTV hi kan hmang ṭangkai hle,” an ti a; thil sual tia rinhlelhte’n dâwt an sawi leh sawi loh finfiahna atan pawh CCTV chu a ṭangkai hle tih an sawi.

CCTV control room-ah hian police-te pawh an duh hun hunah an lut thei lo a, SP aṭanga phalna lak a ngai. Thubuai atana ṭangkai tur nia an hriat an lak chhuah duh pawhin, a hranpaa dilna an siam a ngai a ni.

A thawh khatna atan cheng nuai 395.5 hmangin Aizawl khawpuia hmun 10-ah CCTV camera vuah a ni tawh a, hmun 23 dangah vuah leh tur a ni. CCTV Control Room chu Aizawl SP Office-ah chiah dah a la ni a, police station dangah pawh dah an la tum a ni.

– See more at: http://www.vanglaini.org/tualchhung/46346#sthash.AGb8uh0Y.dpuf

Facebook Comments
Leave a Reply