Posted on

Fashion Fiesta: MEN’S WEAR WINTER

Fashion Fiesta: MEN’S WEAR WINTER

Thlasik sawi apiangin kawrlum a ri nghal a, kawrlum, min tilum tur sawi chuan Coat rilruah lo lang nghal tlangpui. Coat han tih deuh tawp hi chuan rilruah kawrchung nghawng nei, a chhung lining ngei mai, lum ṭha tak kha a lang mai a, dik pawh a dik reng a, coat chi hrang hrang kan tlangvalte mamawh leh hriat tur tarlang dawn teh ang. A pawimawh hmasa chu khawi hmuna hak tur nge tih leh, i hak chhuahna tur khua a zira i inbel thiam a pawimawh hmasa hle a ni. Puipun nikhua leh incheina deuha hman chi coat te chu:

Duffle coat an tih mai coat lum nuam  tak mai, a chhung hmul thar mai leh a inkilh dan dangdai tak avanga mi tam zawk hak nuam tih hi thlasik khawvawt tak takah chuan inbel a ṭha. Readymade-ah chuan sang li chuang te a kai ṭhin avangin Mizo te kan vanneihna, secondhand lamah lei mai theihin an pho chhuak leh nual dawn a, thlasik khawvawt tuar thei lo tan chuan lei ngei ngei chi, he coat tilum leh changtlung zualtu chu a lukhum nei hi a ni a, a chhungah kawrlum pangngai te hain emaw, jacket te ha tho siin inbel la, a tunlaiin khawvawt laka min humhimtu ṭha tak a ni bawk.

Overcoat/Topcoat, tlema kei ka ni inti leh, business lam khawih tana inbel ngei ngei chi, tun thlasika i hman ṭangkai leh em em tur chu overcoat an tih mai, kawrchung fual hi pakhat tal lo kawl ve rawh, mi a tilumin a ti inchei a, a smart-in a zahawm bawk. Tlema puithu lutuk duh lo tan pawh a design tlema formal lutuk lo thlan mai tur a ni. Ni tina coat haa hna thawk tan phei chuan tun thlasik bikah kum tluana i coat hak kha lo dah ṭha la, overcoat-in i lo thlak rih dawn nia. Topcoat hi chu overcoat aia tlema a puan pan deuh, hak awlsam deuh sawina anih vangin rit leh formal lutuk ngai thei lo tan a ṭha phian ta ve ang.

Pea coat ve thung le, hetiang hi chu kan hriatthiam dan tur chuan overcoat aia chhing deuh, coat aia fual hret si ang ho sawina a ni a, a design a nalh duh phian a, tlema sang deuh leh tawi lam tan an mawipui theih ve ve chi a ni a, kum tluana inbel theih chi anih avangin a ṭangkai phian ta ve ang.

Trench coat kan hriatthiam dan tur chuan fual tho si, rain coat kan tih ang chi deuh, kan hriatthiam dan tur chuan rain coat tunlai deuh tihna a ni mai. A design a nalhin milar lamten an uar hle a, a bikin a hmei a pain a inbel kawp theih avang hian lar pawh a lar phian reng a ni. Trench hi readymade-ah chuan a to deuh hlek mai thei a, bakah designers trench te phei chu a man a to uchuak deuh bawk nen, secondhand lam melh leh phawt mai ula, in tisual tam awm lo e.

Parka jacket ve thung hi chu a formal lem lo a. Amaherawhchu, thlasikah na na na chuan a lum ṭha pawl tak chu a ni ngei ang le. A nghawnga sahmul awm te hian a ti thlasik bikin amah hi windproof kan tih ang chi, thli thaw laka min vengtu ṭha tak a ni bawk. Two wheelers khalh ṭhin te leh thawmhnaw puithu ngaina vak lo tan chuan thlasika inbel chi ṭha tak a ni. Puffer jacket, jacket puar deuh pep pup kan tih ang chi ho hi a ni a. Tlema changkang deuh leh brand ṭha deuh hlek hak a ṭha, a chhan chu a man tlawm deuh hi chu a fittings a fuh loh bakah a puar pup ringawt ṭhin a, a lang cheap duh hle a, mi nawlpui inbel chi lutuk pawh a ni lem lo, tlema ria sang lam te leh cher t> deuh hlek ten an inhmeh bik ṭhin.

Leather jacket, sawizau vak ngaiah ka ruat lo kan hmelhriat vek, kum tinin thlasik dawnah chuan nei lo nih kan hlau vek ṭhin. A tu a te pawh hian incheina ṭha tak atan kan kawl vek awm e, tlema a design danglam deuh, bomber jacket te pawh hi tunlai ṭhalaite zingah a tla na hle, bikers jacket tih te pawhin kan hmelhriat awm e. A tlangpuiin a design a zirin puipunna leh chhuahvahnaa kan inbel dan a danglam det, jacket ngai reng kha a kekawr i inbelpui leh pheikhawk i bun a zirin formal leh casual-ah i ha kawp thei ve ve.

Tluangpuii Hmar
Instructress
Vakiria Institute of Fashion Technology

– See more at: http://www.vanglaini.org/thalai/46323#sthash.c7piXYpp.dpuf

Facebook Comments
Leave a Reply