Marova Memorial final zan khatna Zarkawt BCA an chak phawt

Marova Memorial final zan khatna Zarkawt BCA an chak phawt

Khatla TBL-in tualchhung basketball an thununna a tawp hnai em? Thawhlehni zan 3rd Marova Memorial Basketball Tournament final thawh khatnaah Zarkawt BCA-in Khatla TBL chu 72-71 in an hneh. Nizan khan final thawh hnihna khelh a ni a, result kan hre hman lo.

Hawla Indoor Stadium, Republic Vengthlanga inkhelah Mizoram Super League champion TBL-in inkhel bul an ṭan ṭha zawk a, quarter khatna aṭanga quarter thumna thlengin inkhel thununtu an ni.

Amaherawhchu, quarter linaah BCA lamain champion zia an chhuah a, inkhelh ṭan hma a manager Malsawmtluanga sawi ang ngeiin an zam lo tih an inkhel aṭangin a hriat theih. Second 20 chauh khelh hmabak a la awm tihin TBL lam hian 71-70 in hma an la hruai. Mahse, second sarih chauh a awm tawh tihah BCA tan captain David Lalruatfela a rawn inlar a, point hnih rawn thawkchhuakin 72-71 in a team te a chakpui ta a ni.

BCA hian TBL lakah hian tun hnaiah result ṭha an hlawhchhuak hlei thei lo a, a zawnin match li chhung an hneh lo tawh. Mahse, tunah chuan an record duhawm lo tak hi an kalsan thei ta.

– See more at: http://www.vanglaini.org/infiamna/46220#sthash.9ZZFiOhE.dpuf

Facebook Comments

Add a Comment