Posted on

I League khelhna turin Rajiv Gandhi Stadium a inpeih hnai AIFF, MFA, Aizawl FC, sorkar an ṭang

I League khelhna turin Rajiv Gandhi Stadium a inpeih hnai AIFF, MFA, Aizawl FC, sorkar an ṭang

India rama club football inelna sang ber, I League khelhna atan Rajiv Gandhi Stadium, Mualpui chu chei mek a ni. All India Football Federation chuan November 16 leh 17 khan he khelmual hi an endik a, January-a inkhel thleng hman tura peih fel a ni ang.

AIFF aṭangin I League department hotu Akshay Rohatgi, manager, I-League bakah assistant manager, Club Licensing & League Operations Indranil Das-te chuan November 16 khan Rajiv Gandhi Stadium hi an tlawh a, he mi zan hian MFA president Lal Thanzara chu a inah an kawm a, November 17 zingah stadium hi PWD hotute nen an tlawh leh bawk a ni.

AIFF palaite hian Aizawlah ngei I League khelh a nih theihna turin ṭan an la nasa a, Mizoram Football Association bakah a inkhel tur Aizawl FC lamin ṭan an la a, sorkar lamin theihtawp a chhuah bawk.

Endikna hmasa
November 16 chhunah AIFF hotute hian Aizawl an lo thleng a, MFA leh Aizawl FC official-te nen Mualpui hi pan nghalin I League khelhna tura a inpeih leh peih loh an enfiah.

AIFF lam chuan an lo kal hmasak leh tun inkarah hmasawnna nasa tak an hmuh thu an sawi rualin, I League khelhna tura mamawh hmasa hmun ṭhenkhatte chu rang zawka peih an duh thu an sawi. AIFF lam chuan dressing room peih hmasak an duh a, hei hi PWD official-te chuan December-ah an peih fel tur thu an sawi a, inbualna pindan (shower) leh player-te ṭhutna leh thawmhnaw dahna/khaina siam hmabak a la awm a, an peih fel hman an beisei.

Facebook Comments
Leave a Reply