Posted on

Kut hnathawh zahpui lo turin chah

Kut hnathawh zahpui lo turin chah

Sports Minister Zodintluanga chuan, Mizo ṭhalaite chu kut hnathawh zahpui loa uar tur leh zingah tho hma turin a chah.

Zodintluanga hian nimina East Lungdar khelmuala 17th Tuipui-Tuichangral Games 2015 a hawnnaah thu sawiin, “Kut hnathawh kan uar a ngai a, kan zahpui tur a ni lo. Nu leh pate an taima em em a, theihtawpa hna an thawh avangin zirna ṭha tak tak in neih theih phah a ni. Tuna ṭhalaite hian kan nu leh pate ang lo takin kut hnathawh kan zahpui ang a, kan hreh ang tih ka hlau hle a ni,” tiin ṭhalaite a fuih.

Ku thnathawh chu hnualsuat chi a nih loh thu sawiin Zodintluanga chuan, nu leh pate’mn rim taka an thawh avangin an fate’n college-ah zirna sang an chhunzawm theih phah tih a sawi a, “Kut hnathawh hi a hlâwk tawh a, sorkar hna ringawt i beisei lo ang u. Lehkha kan thiam poh leh kut hnathawh hi a hlawk a; sorkar hna nghet mumal thei lo inchuha kan buai chhung hian kut hnathawk mite’n sum tam tak an la lut a, mistiri-te phei chuan thla khatah cheng sing hnih/thum an la lut thei a ni,” a ti.

Sports Minister chuan, East Lungdar khuaah Rural Development department aṭangin sports complex changtlung tak siamna tur sum pek chhuah a nih tawh thu a sawi a; infiamna chu eizawnna tlak a nih thu leh Mizo ṭhalai tam takin eizawn nan an hman mek thu a sawi bawk.

Tuipui-Tuichangral Games hi kum 1970-ah neih ṭan a ni a, tun ṭumah hian khaw 15 telin, infiamna chi hrang 54-ah an inel dawn a ni. A hawnna inkhawmah hian bialtu MLA Vanlalawmpuii Chawngthu pawhin thu a sawi.

– See more at: http://www.vanglaini.org/tualchhung/45928#sthash.su9pitDh.dpuf

Facebook Comments
Leave a Reply