Posted on

Zoram Titi Khawtlang sualna – Engtia do tur nge?

Zoram Titi Khawtlang sualna – Engtia do tur nge?

Vanglaini chanchinbu-in October 31, 2015-a Aijal Club-a Zoram Titi vawi ngana a buatsaiha telte’n an sawi ṭhenkhatte a hnuaiah hian dah chhunzawm a ni. www.vanglaini.org

Dr Chawnglungmuana, SHALOM

Sualna veng tur leh thil sual ti ṭhinte enkawl kawngah home-te leh khawtlangte ṭanrual a pawimawh a, ṭanho ṭhat chuan a sâwt hle. Shalom leh a awmna Zarkawt JAC-te pawh ṭangrual takin kan thawkho a, awmzia a nei hle. Thil sual ti ṭhin, sim harsat tak takte uluk taka kaihhruai a ngai a; JAC lamin an mante pawh counselling pek ṭhin an ni.

T Sangkunga, MLA

Khawlaia awm ṭha duh lo leh thil sual tite Bethel Camping Centre-ah kan vawm khawm zung zung ṭhin a. Dahkhawmna tur home tam tak awm thei se. India rama dan tam lutuk hian min tibuai a, paih ṭhen a ṭul. A ṭul huna mob rule hman ṭha ti mi ka ni. www.vanglaini.org

DR Zirliana, Journalist

Hmeichhe inzuar chungchangah te, ruihhlo chungchangahte demand awm tih a chiang a, kan thîkthu chhiat lutuk vang hian mi nun kan tihchhiat hi a tam lo mo? Mi right palzut lo zawnga kan chet a ṭha ang.

Rualkhuma Hmar, Advocate

Khawtlang sualna veng tur hian political reform a ngai a, kan politician-te hi reform an ngai. Veng tin hian national volunteer awm se, a mihring inthlak ṭhin se. Systematic approach awm se, sorkar nena ṭang dunin khawtlang sualna kan veng thei ang. Review Committee awm ṭhin se la, khaw tin hian paid counsellor-te nei se, moral reform kan mamawh. Economic condition kan insiam rem a ngai. www.vanglaini.org

Rev. C Vanlaldika, BCM

Kan changkanna hi rualawhnain a hrin chhuah a ni a, a pawi. Hmasawnnain sualna a keng tel tih kan hria, kan ramin a tawng mek. Hrem hlau lo ṭhalai an tam a; kohhran, kan kristianna leh taksa thil kan ṭhen hrang lutuk hi kan kal sualna bul a ni. Intih Mizo kan tum viau laiin, western individualsm-in min tibuai viau. www.vanglaini.org

Vanlaltana, Vice President, MZP

Khawtlang sualna chu a chhan a awm tur a ni. Hruaitu ṭha kan mamawh. Sawipuitu nei ṭha aia mithiam an dinchan hunah kan ram a dam ang. Sorkar hnathawk aia kut hnathawk an dinchan hunah ram a ziaawm ang. A thiam thiam aia sawipuitu nei ṭha an tling ṭhin hian ṭhalaite a tihnual a, ṭhalaiteah nghawng ṭha lo a nei a ni. Ṭhalaite hian thawh tur nei se, an sual hman lo ang. www.vanglaini.org

Rev. Jonathan Pachuau, Synod

Media hian tun aia nasa hian kan moral min vensak se. Mi dang mamawh loa inngaihna (individualism) lian chak lutuk hian sualna a hring. Kohhran kan sêl bawrh bawrh a, a hnuah kohhran huangah kan vawm lut leh tho a, a fuh lo. Khawtlang sualnaah hian politician-te’n a hlâwkna an tél a. A chhawrtu sorkarin eiru a tih loh hi kohhranin a eiru lo tih ngawt a har. Red light area-te siam law law ila a ṭha zawk ang em? www.vanglaini.org

Rex Zarzoliana, Addl. SP, Aizawl 

Police tan hna thawh a har chang a tam a, hmasawn kan tum ve reng. Police-te kan indaih tâwk lo a, tunah hian vacancy 2,000 chuang fill-up loh a awm. Police hmel hi a hmutu azirin kan danglam viau. Misual kan sawi hi a zau lutuk em? Police-te hi society hlimthla kan ni. Police ni saa piang kan ni lo a, misual man tam zawk hi broken family an ni. Sualna kan enfiah dawn chuan chhungkua a pawimawh hmasa ber. Chhungkua inenkawlna ṭha hnuaia mi chu man tur khawpa sual an awm lem lo. Chhungkua uap loa chhuahsan ṭhin hi a pawi.

T Lalhmachhuani, Evangelist

Sualna do turin sorkar, khawtlang leh kohhran ṭanrual a ngai. NGO-te’n camping neihpui ringawt duhtawk loin, a hnu lamah bawhzui zel ni se. Centre ṭha a ngai a, eizawnna, mahni kea an din theihna tur ngaihtuahpui a ngai. Zan inkhawm a ṭhat rualin, a cháng chuan inkhawm aiah outreach programme-te neih theih ṭhin ni se. Nasa zawka awareness campaign neih a ngai. Kan ngaihhlut leh ngaihsan zawngte thlak a hun. Thil dik leh ṭha inzirtir aia mi laka lan mawi tumnate hi kan infah ngun lutuk. Piangthar, Pathian thu awih tak tak nih a ngai.

Vanneihtluanga, Editor, Lengzem

Kan police-te hmalakna chhunzawmin CCTV hi a tam thei ang ber vuah ta ila, mahni in bul vela CCTV vuah turin camera intum pawh kan hreh lo ang. Vai ram ang hian guard nei ve mai ila, aman intumsemte pawhin a tih theih ang. Driving licence hûm nazawng hi taxi driver nih phal lo ila. Counselling paltlang vek lo chu taxi khalhtir loh ni se. Sualna tam tak, nawhchizawrhnate thlenga inhnawmhnawih chu taxi driver ṭhenkhat hi an ni fo. Zu rûiin thil an tihchhiat hi zu zuarte’n tum rawh se, zu vanga sualna hi intihzahnain a reh deuh mai ang. Kohhran hi hei ai hian a ṭang thei ang em? Kohhranin a chhawkin zu rûi mante hi ṭawngṭaisak ta se. Misual mante chu an kohhran thlengin chanchinbuah/TV-ah tarlan ni zel se. Police-in an mante doctor-in thi lek leka ni âwma lehkha an ziahsak chuan, doctor chu man mai a fuh em? Materialism vangin KS kan ngah. Police lak hi uluk ni bawk se. www.vanglaini.org

B Lalramenga, Advocate

Khawtlang inrêlbawlna ṭha kan mamawh. Man theitu tur ni loin an lo man ve hi dan mithmuhah a tlak leh ṭhin chhan a ni fo. Dan hrang hrangin man phalsak dan a nei zel. Dan kan zawh famkim loh vang hian misual man an chhuak leh fo.

C Lalrinliana, Zarkawt

Kohhran hian chhungkaw keh awm loh nan hma la nasa zual se. YMA, MHIP leh kohhrante’n chhungkaw ṭha invawn dan zirtir uar se. Zirna hi chhungkaw dawta kan innghahna a ni a, syllabus ennawn a ṭul. Inhriat chian ngam a ngai.

Dr Malsawmliana, Asst. Prof. TRC

Khawtlang sualna hi tu ven tur nge? Kan thawhhona a ṭhain kan lungrual tur a ni. Hemi kawnga thawktute hi kan lungrual em? Kohhranin zan an chang tam a, hei ai hian tha han thawh tam leh deuh se. Veng tinah ruihhloa buai kan neihte hi dahna tur a váng. Sorkar hian home ṭanpuina pein, tichangtlung lehzual se.

K Sapdanga, Editor, Vanglaini

Chhungkaw kehchhia aṭanga chawr chhuakte hi buaipui an ngai nasa. An case azirin ṭawngṭai ngai chi te, zilh deuh chawrh chawrha ṭha theite an awm. Sualna tam tak hi veng turin ram rorelna hi a bul inṭanna a ni. Khawchhak lam ram ralmuang tia sawi ṭhinah chuan hremna a na fál hle. Sualna tam ber hi hrema reh thei a ni tih a lang.Rule of law hi ram damna a ni berin ka hria. www.vanglaini.org

Dunglena

Nu leh pate’n fate hriat chian a ngai a, an nu kawng tinreng an hriat a pawimawh. An tih turte tihpui peih a ṭha. Liberal society angin red light area siam ve a ṭha mai lo’m ni?

Lalrammawia, H/S Headmaster

Red light area siam mai a ṭha. YMA pawhin kan man chuan Court-ah thuhretua ṭan kan hreh loh a ngai. Ruihhloa buaite leh khawtlang duh loh ti ṭhinte eizawnna siamsak hi sorkar bat a ni lo. Pathian hi a mumal a, a zuitute chuan dan mumal an zâwm ṭhin. Nupui/pasal innneih fimkhur a ngai a, inṭhen kan sam loh a ngai. www.vanglaini.org

– See more at: http://www.vanglaini.org/tualchhung/45413#sthash.SVxNKwjm.dpuf

Facebook Comments
Leave a Reply