Luangmual leh Chanmari West an inhnehtawk

Luangmual leh Chanmari West an inhnehtawk

Mizoram Premier League Season 4 Phase 2-ah transfer nghawng a lang a, player tharten inkhel an tihmuhnawm nghal a. Luangmual FC leh Chanmari West FC te inkarah erawh chungnung zawk an awm lo, 3-3 in an inhnehtawk.

Luangmual tan player thar Rosangliana leh B. Malsawmzuala bakah man of the match a thlan Lalṭhazuala’n (Puitea) ten goal an khung a, Chanmari West FC tan Zosangliana’n (Chhaia) goal hnih a khung a, Vanlalbiaa Chhangte-in penalty aṭangin a pet goal ve bawk. 

MPL4 Round 7-ah Chanmari West an chak a, Round 8-ah erawh West Warrior hian ṭum hnih lai an siphurh an sut a, inkhel pumpui aṭanga thlirin draw hi result awm tak a ni.

Inkhel Hmuhnawm
Luangmual FC-in starting eleven-ah player thar paruk an an luhtir a, Chanmari West FC-in transfer laia an lak player pahnih an hmang nghal bawk.

Chanmari West-in Phase 1-a wing back-a an chhawr Vanneihtluanga chu winger-ah chhawrin Tuikual North tlangval hian Luangmual tlarhnung a chhaih buai hneh hle. Rawlthar forward Lalnunsanga’n Hnamte-in West Warrior tana chance ṭha a hlah hnuah Dinthar FC aṭanga an lakluh Chhaia’n minute 17-naah club thar Chanmari West tan goal hmahruai a khung.

Luangmual an insiamrem a, player thar F. Lalmuansanga’n (Puitea Fanai) Chanmari West wing back thar Zomuanpuia tan hun harsa a siam a, Bulfekzawl tlangval Zomuana hi first half-ah thlak a ngai hial. Sesawng tlangval Puitea Fanai chuan Lalṭhazuala (Puitea) cross ṭha tak khung lo mah se a tihsual siam ṭhain a ball pet ṭha tak chu West Warrior keeper Liansangpuia’n a tihper hnuah player thar RS-a’n awlsam takin an siphurh a sut.

Ding lam kilah Puitea Fanai bawk a hmuhnawm a, Luangmual winger ball cross ṭha tak chu minute 34-naah a hming pui Puitea’n ṭha takin a tauh lut a, first half-ah West Warrior-in goal khat an khung a, Luangmual-in goal hnih an khung.

Second half-ah Luangmual an fimkhur a, goal venhim an ngai pawimawh nghal. Vanlalrova hoten goal venhim an tum luatah defender Hmingthanzauva’n penalty chawiin Vanlalbiaa’n minute 67-naah siphurh sutna atan a hmang.

Goal hnih ve ve luh hnuah inkhel hmuhnawmnain tawp lam a pan lo a, MPL4-a Zo United tana goal khung thei lo Sawmtea’n Luangmual tan minute 71-naah goal ropui a khung. Chanmari West lamin goal mawi thoin an chhang let a, minute 79-naah Chhaia’n box pawn aṭangin a pet kum lut nalh hle.

Goal khung an tum ve ve avangin hun tawp hma minute 10 a hmuhnawm a, goal a luh belh loh avangin 3-3 in an inhnehtawk.

Eng nge an sawi?
Luangmual FC coach Vanlalrova chuan, “Player thar nen kan practice tam lo a, kan khelh danah sawisel tur a la tam hle,” tiin khel ṭha mah se an result-ah a lungawi loh thu a sawi.

Chanmari West FC chairman Lalbiakhlua chuan, “Kan khelh dan aṭanga thlirin transfer kan hmang ṭha hlein ka hria, player thar Chhaia’n goal hnih a khung nghal a, midang pawh match fitness an neih chuan an ṭangkai thei ang. Luangmual an ṭha a, chutichung chuan chak thei tur chu kan niin ka hria. Point khat chauh kan hmu chu ka ui khawp mai,” tiin a sawi.

Inkhel Thlirna Tawi
Chanmari West FC 3-3 Luangmual FC 
CWFC : Zosangliana Sailo 17′, 79′; Vanlalbiaa Chhangte 67′(P).
LFC : Rosangliana 28′; Lalthazuala 34′; B. Malsawmzuala 71′.
MoM: Lalthazuala (Puitea), Luangmual FC

ZoFooty Statistics
50%   Ball Possession   50%
16(6)   Shots (On Target)   11(5)
0   Yellow Cards   2
0   Red Cards   0
Powered by TT Royte Group

– See more at: http://www.vanglaini.org/infiamna/45196#sthash.cPEzH2nE.dpuf

Facebook Comments

Add a Comment