Posted on

P&E-in Power Policy a buaipui mek Electric consumer 1,90,000 vel awm

P&E-in Power Policy a buaipui mek Electric consumer 1,90,000 vel awm

Chief minister Lal Thanhawla chuan, Mizoramah kawlphetha chungchangah policy mumal a la awm lo tih sawiin, Power Policy ṭha tak buaipui mek a nih thu a sawi. Power & Electricity engineer-in-chief Liannghinglova Pachuau chuan P&E-in Mizoramah consumer 1,90,000 vel an neih mek thu a sawi bawk.

Joint Electricity Regulatory Commission (JERC) for Manipur and Mizoram leh Mizoram sorkara Power & Electricity department chuan nimin khan Synod Conference Centre-ah electricity leh a kaihhnawih thilte zirhona an buatsaih a, CM Lal Thanhawla khuallian a ni.

Chief Minister chuan, “Power Policy ṭha tak leh awmza nei tak nei turin kan engineer-te’n an ruahman mek a, thil nghahhlelhawm tak a ni,” a ti a; kawlphetha renchem a ṭul thu leh, Mizoram chu kawlphetha lak luhna leh asem chhuahnaa hloh nasa ber a nih thu a sawi.

Lal Thanhawla chuan, Mizorama kawlphetha hman man (power tariff) chu India rama a hniam ber nia a hriat thu a sawi a, “Mizoramah chhiah kan la pe tam tawk lo hle a, sorkar ṭha taka a kal theih nan chhiah pek leh power man pawh kan inhuam ve deuh a ngai a ni,” a ti.

CM Hawla chuan, India hmarchhak bialah kawhphetha megawatt 58,961 siam chhuah theihna a awm laiin, megawatt 4,000 chuang hret chauh siam chhuah a la nih thu a sawi a, “State tin hian power duhkhawp kan la nei lo vek a ni,” a ti.

P&E E-in-C Liannghinglova Pachuau chuan, Mizoramah electric power connection 1,90,000 vel a awm tih a sawi a; kum 2001 chhiarpui leh 2011 chhiarpui inkarah khua 29-a a pun thu sawiin, “Census khaw thar 29 leh census khua ni lem lo khaw tepên 15-te tihênna tur thawh ṭan mek a ni a, heng hi zawh a nih hunah chuan Mizorama census village 704-te tihên a ni tawh ang,” a ti.

Tun dinhmuna Mizorama kawlphetha mamawh chu chhun lamah megawatt 45-60 a ni a, zan lamah megawatt 70-85 a ni. Mizoram chhung bikah kawlphetha megawatt 29 vel siam chhuah theih niin, Serlui-B HEP tih loh chu fûrah chiah hman theih a ni a; chutih laiin, Mizoramah lui hmangin kawlphetha megawatt 3,500 vel siam chhuah theiha ngaih a ni. www.vanglaini.org

Kum 2014-15 chhungin Mizoramin state pawn aṭangin power million unit (MU) 502.50 a lei a, Mizoram chhungah MU 35.18 siam chhuah ve a ni. Power lei nan cheng nuai 16948 hman niin, unit khat Rs. 3.37-a lei ang a ni a, power leina man aṭanga chhûtin, Mizorama siam chhuah bik chu cheng nuai 1187 hû a ni. State chhungah chawhrualin MU 405.16 sem/hralh a ni a, chuta ṭang chuan cheng nuai 12590 hmuh a ni.

Mizoramin kawlphetha a lak luh tawh, mu reh lai ang vela kawlphetha a chuangbâng awmte chu internet kaltlangin state páwnah hralh a ni a, chuta ṭang chuan cheng nuai 1355 hmuh a ni. State pawn aṭanga kawlphetha lak luhte chu a kalkawngah 4% vel hloh anga chhût a ni a, Mizoram chhunga a sem chhuahna vela hloh zat (distribution loss) chu 27.73% vela chhût a ni thung.

P&E E-in-C chuan, kawlphethaa transmision & distribution loss a tlem zawk nan Mizoramah transformer 80 bun belh tum a nih thu a sawi a; khawl leh line chhiat vanga Mizoram chhim lamin harsatna an tawh ṭhin sutkian nan kawlphetha pekna tur line dang siam belh ṭan mek a nih thu a sawi bawk.

HEP atana Mizoramin MoU a ziah tawhte

# Project MW Developer MoU ziah ni
1 Tuivawl HEP 42 SPML 3.11.2011
2 Lungreng HEP 815 NEEPCO 26.3.2010
3 Chhimtuipui HEP 635 NEEPCO 26.3.2010
4 Mat HEP 76 NEEPCO 26.3.2010
5 Kolodyne-II HEP 460 NTPC 22.3.2008
6 Tlawng HEP 55 Shyam Century Ferrous 10.8.2012
7 Bairabi Dam 60 Sikaria Power 10.8.2012
8 Tuivai HEP 210 NEEPCO 11.2.2015

– See more at: http://www.vanglaini.org/tualchhung/45064#sthash.e0fFETKU.dpuf

Facebook Comments
Leave a Reply