MHL Final: Tuikhuahtlang VS Bungkawn

MHL Final: Tuikhuahtlang VS Bungkawn

Mizoram Table Tennis Association (MTTA) leh Zonet Cable Network-te buatsaih Mizoram Hexa League (MHL) chu zanin dar 7:00 hian a hmawr bawk a ni dawn a; Tuikhuahtlang Table Tennis Club leh Bungkawn Games & Sports Association te an inhmachhawn ang.

MHL-ah hian club paruk Ramhlun Sporting Club, Mission Vengthlang TT Club, Bungkawn Sporting Club, Tuikhuahtlang TT Club, Smashers (Vaivakawn) leh Mission Veng La Paloma te an awm a, club tinah hian player paruk zel an awm.

MHL club 6 te hi vawi hnih ṭheuh an intumkual a, a chak zawkin point hnih, chak lo zawkin point khat hmuin an inkhelh kual vek hnuah a sang pahnihin final an lut.

Table-a hmahruaitu Tuikhuahtlang hian match 10 khelh aṭangin point 18 hmuin hmahruaitu an ni a, zanin an khingpui tur Bungkawn hian khelh zat inangah point 17 an hmu thung.

Famkim lo
Bungkawn hi league match-ah vawi thum chak lovin zanin final a an tum tur Tuikhuahtlang hi tum hnih an hneh loh bakah Ramhlun Sporting Club chu vawi khat an hneh lo bawk.

Tuikhuahtlang Table Tennis Club hi league-ah vawi 8 chakin first leg-ah The Smashers Vaivakawn lakah an chak loh bakah Mission Vengthlang lakah second leg-ah an tlawm ve leh bawk.

Tuikhuahtlang an chungnung
Zanina inkhel tur team pahnihte hi vawi hnih an lo inhmachhawn tawh a, hengah hian Tuikhuahtlang hian 3-2 in hnehna an chang ve ve a, zaninah pawh hian inrintawkna sang tak nen final an khel thei ang.

Amaherawchu, Bungkawn captain David Zodinpuia chuan, “Kan inhmachhawn tawh vawi hnihah khan vanduai vangin kan chak lo a, zaninah erawh a danglam tawh ang. Fimkhur takin champion ngei turin kan khel dawn,” a ti. Hei vang hian Tuikhuahtlang hi chak chiang sa a tih ngawt theih bik loh ang.

Tuikhuahtlang captain C. Lalmuanpuia chuan, “Hneh sa a sawi theih loh. Match hnih kan inkhelh tawhah khan vanneih vanga chak kan nih avangin zaninah hian kan inthlahdah thiang lo ang,” tiin a sawi bawk.

Mipui mit fukna
David Zodinpuia, Bungkawn : Mizoram single number 3 ni mek David-a hian MHL league match 14 a khelh aṭangin vawi 12 ngawt hnehna a chang thei. International leh national level Sub Jr Category-ah Gold medal lo dawng tawh a nih avangin zaninah pawh hian Bungkawn innghahna a ni leh ang.

Basanta Meisnam, Tuikhuahtlang : National level Sub Jr category bronze medalist Basanta hi kum upa lam deuh tawh ni mah se a thiam a la theihnghilh lo. MHL league match 16 a khelh aṭanga vawi 10 hnehna chang thei a nih avangin player hlauhawm berte zinga mi a la ni reng.

– See more at: http://www.vanglaini.org/infiamna/45082#sthash.JXAKuuRE.dpuf

Facebook Comments

Add a Comment