Aizawl FC-ah Japanese midfielder Kinowaki

Aizawl FC-ah Japanese midfielder Kinowaki

I League club Aizawl FC chuan Mizoram Premier League Season 4 khel turin Japanese defensive midfielder Yuta Kinowaki an la lut.

Nimin khan Mizoram Football Association hnuaia transfer vawi hnihna khar a ni a, Aizawl FC-in player la tam lo mah se an lakchhun Japanese player-in ngaihven a hlawh hle. MPL4 hmahruai mektu Aizawl FC hian player pakhat chiah an chhuah a, rawlthar keeper David Lalrinpuia chu intuaihriam turin Aizawl DFA hnuaia first division club Aizawl FC Academy-ah an chhuahtir.

Tu nge Kinowaki?
Yuta Kinowaki hian Japan tualchhung club Kyoto Shiko SC aṭangin Aizawl FC hi zawm a, Japan club tana a khelh hma hian Poland III Liga club Energetyk Grifino leh Latvia league sang ber club BFC Daugavpils tan a khel tawh. Daugavpils-ah hian Kinowaki hi right back-a chhawr a ni a, match zawng zawngah a inlan kim vek.

kum 24-a upa Kinowaki hi defensive midfielder a ni a, a san zawng hi feet 5 leh inches 11 a sang niin tlarhnung position hrang hranga chhawr theih vek nia an sawi hi a mak hran lo.

Aizawl FC hian I League an khelh dawn avangin squad tih chhah an mamawh a, Kinowaki hi an mamawh player a ni em tih hi zawhna awm thei chu a ni. Aizawl FC technical director Hmingthansanga chuan, “Position pahniha khel thei player kan mamawh a, defender chauh la dawn ilang chuan hriat chian tawh Emma Chigozie pawh kan la thei a, mah se tun dinhmunah chuan I League thlir tel a ngaih avangin Japanese player Yuta Kinowaki hi kan thlang ta zawk a ni. Kinowaki hi defensive midfield-ah a chhawr theih a, defence-ah chuan khawiah pawh a chhawr theih bawk,” tiin an player thar chungchang a sawi.

Hmingthana chuan lawmthu sawi zuiin, “I League thlir chunga kan mamawh foreign player ṭha tak lei theihna tur budget min pek avangin president chungah kan lawm takzet a ni,” a ti.

Hmunruak a awm em?
Japanese midfielder Kinowaki hian Aizawl FC-a starting eleven chang tur chuan match sarih chhung la inlan vek H. Lalbiakthanga a nek chhuah a ngai dawn a, Kawnpui tlangval hian MPL4-ah minute 611 a inlan tawh avangin awlsam taka position chhuhsak chi a ni lo ang.

Aizawl FC hian MPL4-ah goal ruk chiah an chhuah a, an tlarhnung a phui ber. Manuel Retamero kaihhruaina hnuaiah Aizawl FC defender pathum Lalramchullova, Immanuel HS Lalthazuala leh Lalruatthara te chu MPL4 minute zawng zawngah an inlan vek. Inhliam vangin Ronald Zothanzama’n match li chauh a khel a, Bawngkawn defender Ronald leh Japanese player Kinowaki te hian tlarhnung lamah khelhna hmun an inchuh thei bawk ang.

Point 18 hmua MPL4 hmahruaitu Aizawl FC hian Zirtawpni tlai hian Round 7-a an hneh tawh Zo United FC an hmachhawn dawn.

Semifinal thlen ngei kan tum – Tluanga
Dinthar FC-in transfer laiin player pariat an la lut a, manager Lalnuntluanga chuan semifinal thlen ngei an tum thu Vanglaini palai a hrilh.

MPL1 champion Dinthar FC hian MPL4 ṭantirhah an player ṭhahnem tak chhuah mah se Phase 1-ah point 11 hmuin pathumna an ni a, season tawpah semifinal khelh phak an tum ruh hle.

Dinthar hian Guwahati club Dynamo aṭangin Bengali keeper Sanjay Niswas an la lut a, Tlangnuam keeper Lalfakzuala Hrahsel an la lut bawk. Dinthar hian goalkeeper chetsual vangin MPL4 ṭantirhah point an hloh a, transfer-ah an tlarhnung tiphui tura pawimawh goalkeeper an ngaihthah lo.

Goalkeeper pahnih bakah Dinthar FC-in BVT aṭangin midfielder ṭha Chhanrinpianga leh Royal Wahingdoh tan pawha khel tawh Khatla defender B. Zothanmawia te an la lut a. MPL-a hming chher chawp tur R. Lalawmpuia (Khawzawl), K Lalsawmtluanga (Ngopa), Lalrintluanga (Hualtu) leh C Remmawia (Zemabawk) te an ziak lut bawk.

West Warrior an ṭha sawt
Chanmari West FC-in transfer laiin player panga an la lut a, Chanmari FC aṭanga an lakluh defender pahnih Zohmangaiha Ralte leh C. Zomuanpuia bakah Dinthar FC aṭanga an lakluh midfielder Zosangliana Sailo te hi Mizoram Premier League-a tawnhriat nei sa an ni a, an ṭangkaipui ang.

West Warrior hian MPL4 Phase 1-ah point 10 hmuin palina an ni pha chiah chiah a, season tawpah tuna an awmna aṭanga tlakhniam an tum lo. Chanmari West FC coach Gosen Lalrammawia chuan, “Player kan lakluhte hi kan ṭhat pui a rinawm a, Zomuanpuia hian training a zawm hma avangin Luangmual FC khelh hunah a inlan theih ka ring. A dang pali pawh hi MPL4-ah player ṭangkai an nih ngei ka beisei,” tiin player thar chungchang a sawi.

Chanmari left back Zomuanpuia leh defender Zohmangaiha Ralte-te hi MPL ṭan hmaa MFA Cup-a SYS FC champion puitute an ni a, Aizawl FC an luh hnuah an tlahniam a, Chanmari FC-a an let hnuah ngai an awh tawh lo. Midfielder Zosangliana hian MPL1-ah Dinthar FC a champion pui a, player dang pahnih Durtlang Leitan forward C. Lianzela leh Chanmari West Veng keeper Lalrempuia te’n local football-ah hming an la chher lo.

Chanmari FC-ah India Junior Trio
MPL2 champion Chanmari FC-in MPL4-a chhawr turin India Junior team-a awm mek captain Daniel Lalhlimpuia, Malsawmzuala leh K. Lalramzauva te an ziak lut.

India Junior team-a Mizo Trio te hian beisei anga MPL4 an khel thei a nih chuan Mizoram Premier League hlutna a belhchhah thei ang. Serchhip rawlthar Daniel-a hi forward a ni a, MPL-ah tawnhriat a la nei lo. Chaltlang midfielder Sawmtea erawh Chanmari FC tan hian a khel tawh ṭhin a, Luangmual rawlthar RZ-a hi Luangmual FC Junior Team tan MPL2 Under 17 inelnaah a inlan tawh bawk.

Chanmari FC hian rawlthar duhawm pathum bakah College Veng veteran keeper Lalthlamuana leh midfielder Ramngaihawma te an ziak lut a, Khatla Bethel rawlthar Ngaihawma hian Chanmari Under 18 team aṭangin senior team a zawm.

Luangmual-ah Sawmtea a kir
Luangmual FC chuan MPL2-a final thlenpuitu captain leh an veng tlangval ni bawk B. Malsawmsawmzuala chu Zo United aṭangin an la lut.

MPL2 finalist hian Sawmtea bakah hian player pakua zet an la lut a, chung zingah chuan an club-a khel tawh Malsawmdawngzela, Daniel-a Pautu, Dinthangpuia, F. Lalmuansanga leh Rosangliana te, India Junior team-a inlan tawh David K. Hmingthanga leh Vanlalruata te bakah tawnhriat la nei lo Vanlalruatpuia leh Lalmuanawma te an tel.

Luangmual hian player 10 an ziak lut a, an chhuah zat a la tam cheu. MPL4-a parukna ni mek Luangmual hian player 16 zet an chhuahtir a, chung zingah chuan match hnuhnung pahniha goal thum khungtu Lalliansanga (Notea) a tel.

Durtlang tlangval Notea hian Luangmual elpui Zo United a zawm a, MPL4-a beisei pha lo Zo United hian Luangmual aṭangin Notea bakah PC Laldinpuia leh Laldinliana Varte an la lut. Sihphir tlangval Dina Varte hian Luangmual FC-in BVT an hneh ṭumin chakna goal a khung.

Zo United-in MPL khelh zel an tumna kawngah Luangmual aṭanga an lakluh tih loh chu player langsar an la lut lo a, player pasarih an lakluh zinga pali dang Francis Lalpekhlua, Rosiamliana, Lalrinhlua leh Lalhmingliana Kawlni te’n khelhna hmun an chang a nih chuan a vawi khatna atan MPL-ah an inlan ang.

Transfer Thlirna Tawi
Aizawl FC
Lut (1) : Yuta Kinowaki (Kyoto Shiko SC)
Chhuak (1) : David Lalrinpuia

Bethlehem VT FC
Lut (3): Jerry Lalrinzuala; Vanlalzuia Hnamte, Lalruatdika (Chanmari FC).
Chhuak (7): Chhanrinpianga, Lalchhantluanga, Lalmawizuala, Lalzatluanga, Hmingthanmawia, S Liankhosiam, Lalrinchhana.

Chanmari FC
Lut (5): Lalthlamuana, Ramngaihawma, Malsawmzuala, K Lalramzauva, Daniel Lalhlimpuia.
Chhuak (8): Lalruatdika, Zohmangaiha Ralte, C Zomuanpuia, Laldailova Thangluah, Malsawmzuala, Michael Lalhruaitluanga, Danny Lalduhsaka, Vanlalremchhuaha.

Chanmari West FC
Lut (5) : Zohmangaiha Ralte (Chanmari FC), C Zomuanpuia (Chanmari FC), Lalrempuia, Zosangliana Sailo (Dinthar FC) leh C. Lianzela (Durtlang FC).
Chhuak (4) : Lalhmangaiha, Lalremruata, Malsawmtluanga, H. Lalzawmliana.

Dinthar FC
Lut (8) : R Lalawmpuia, K. Lalsawmtluanga, Lalrintluanga, B. Zothanmawia, Lalfakzuala Hrahsel, C. Remmawia, Chhanrinpianga (Bethlehem VT FC), Sanjay Niswas(Loan, Dynamo Club, Ghy).
Chhuak (8) : Robert Zomuanpuia, Vanlalchhuanawma Sailo, Vanlalhuma, Lalremmawia, Lalremruata, KT Vanlalhruaia, Zosangliana, R. Lalnunfela.

Luangmual FC
Lut (10) : Malsawmdawngzela, Daniel-a Pautu, Dinthangpuia(Chanmari West), David K Hmingthanga, F. Lalmuansanga, Vanlalruatpuia, Rosangliana, B Malsawmzuala (Zo United), Lalmuanawma, Vanlalruata (Zo United).
Chhuak (16) : PC Laldinpuia, Lalliansanga, Laldinliana Varte, Lalhlimpuia, MS Dawngliana, Jonathan Lalsangzuala, Alex Lalrinnunga, Lalengzauva, B. Lalropuia, Lalnunfela, Danny Lalrohlua, Lalbiakzuala, Biakhmingliana, Lalhriatpuia, Lalruatkima, Lalrinfela Sailo.

Mizoram Police
Lut (0): Nil
Chhuak (0) : Nil

Zo United FC
Lut (7) : PC Laldinpuia (Luangmual FC), Laldinliana Varte (Luangmual FC), Lalliansanga (Luangmual FC), Francis Lalpekhlua, Rosiamliana, Lalrinhlua, Lalhmingliana Kawlni (Kanan FC).
Chhuak (6) : B Malsawmzuala, Vanlalruata, C Vanlalchhana, LK Hmangaihzuala, Jacob Lalhruaisanga, Lalrinsanga.

Note : Player lut hming zawha bracket chhunga mi hi an lakluhna club a ni a, club hming awm lo zawng hi freeman (club khelhna nei lo) an ni.

– See more at: http://www.vanglaini.org/infiamna/45078#sthash.rJEhIDRD.dpuf

Facebook Comments

Add a Comment