Posted on

YMA General Conference vawi 70-na ṭan a ni

YMA General Conference vawi 70-na chu nizan khan Bairabi khelmuala pansal sak, Zofate Rûnah ṭan a ni.

Nizan khan palai lawmna inkhawm neih a ni a, Central YMA treasurer J Lalsailova’n kaihruaiin, Organising Committee chairman PC Zoram Sangliana, bialtu MLA-in inlawmna thu a sawi.

CYMA general secretary Vanlalruata’n annual report pein, finance secretary Lalrochuanga Pachuau-in finance report a pe.

CYMA General Secretary-in a tarlan danin, YMA branch 804, group 46 leh sub-headquarters panga a awm. Member 4,04,535 awmin mipa 2,47,711 leh hmeichhia 1,56,824 an ni.

Mizoram bakah Assam, Meghalaya, Tripura leh Nagaland-ah YMA branch leh group a awm a, Bangladesh-a Sajek khuaah YMA branch a awm bawk.

YMA life member 10,293 an awm mek a; YMA branch zingah library nei 392, park/reserve nei 287, sanctuary nei paruk an awm. YMA hruaitu hlun chawimawina dawng tawh mi 2,378 an awm a, kumina chawimawina dawng thar tur chu mi 71 an ni.

Ruihhlo dotu pawl Supply Reduction Service (SRS) tharthawh leh niin, April 11, 2015-ah hna an thawk ṭan a; September 31, 2015 thlengin ruihhlo Rs. 7,57,60,000 hû an man tawh a, mi 850 an man bawk.

CYMA hian September 2014 leh August 2015 inkarah Rs. 2,02,86,142 an hmu a, hetah hian Myanmar leh Manipur-a tuilian leh leimin tuarte ṭanpuina tur thawhlawm a tel.

– See more at: http://www.vanglaini.org/tualchhung/44693#sthash.5WKhLdpk.dpuf

Facebook Comments
Leave a Reply